April 18, 2021, Sunday
२०७८ बैशाख ५

राेल्पाकाे एउटा भिडियो एक महिना पछि सामाजिक सञ्जालमा भाइरल

3.9K

दुर्घटनाग्रस्त ट्यांकरबाट पोखिएको डिजेल जर्किन तथा बोत्तलमा भर्दै गरेको एउटा भिडियो यतिबेला सामाजिक सञ्जालमा भाइरल छ । भिडियोमा दुर्घटनामा क्षतिग्रस्त भएर सडकमा लडिरहेको ट्यांकरमा निस्किएको पेट्रोलियम पदार्थ केही मानिसहरु बोत्तल तथा जर्किनमा डिजेल भरिरहेका देखिन्छन् ।

गत माघ १५ गते रोल्पा सदुमुकाम नजिकै भएको दुर्घटनाको भिडियो अहिले बल्ल सार्वजनिक भएको जिल्ला प्रशासन कार्यालय रोल्पाले जनाएको छ । रोल्पा नगरपालिका वडा नं. १ भदौरे मन्दिरको घुम्तिमा ना ४ ख २२५७ नम्बरको ट्याङ्कर सडक देखि करिव ५० मिटर तल खसेर दुर्घटनामा परेको रोल्पाका प्रमुख जिल्ला अधिकारी नरेन्द्रकुमार रानाले बताए ।

‘एउटा घुम्तीबाट खसेर ट्यांकर अर्को घुम्तीमा आईपुगेको र दुर्घटनामा चालकको मृत्यु भएको थियो । भिडियो एक महिना अघिको होे,’ प्रजिअ रानाले भने ।नेपालगञ्ज डिपोबाट रोल्पामा रहेको जलजला पेट्रोल पम्पको तेल बोकेर आएको ट्याङ्कर दुर्घटनामा परेको थियो ।दुर्घटनामा परी चालक हरबजन सिंहको ज्यान गएको थियो भने सहचालक १९ वषिर्य सुनिल शंकर सामान्य घाइते भएका थिए ।भाइरल भिडियोमा मानिसहरु हतार-हतार डिजेल भरिरहेका देखिन्छन् । त्यसरी डिजेल भरेको भिडियो प्राप्त भएको नेपाल आयल निगमले जनाएको छ ।कुनै पनि दुर्घटना लगत्तै इन्धनको ट्यांकरबाट त्यसरी इन्धन भर्न अत्यन्तै जोखिमपूर्ण भएको निगमका प्रवक्ता विनित मणि उपाध्याय बताउँछन् ।

‘हामीले पनि ढिलै थाहा पायौं, यो घटना झण्डै एक महिना अघिको हो । त्यस्तो काम गर्नु अर्को दुर्घटना निम्त्याउनु हो,’ प्रवक्ता उपाध्यायले भने ।प्रज्वलनशील डिजेलमा छिटो आगो सल्किने र त्यसले ठूलो मानवीय क्षति निम्त्याउन सक्ने उनले बताए ।डिजेल प्रज्वलनशील भएकै कारण यसलाई अनाधिकृत बिक्रीमा रोक लगाइएको तथा ट्यांकरमा अति प्रज्वलनशील पदार्थ भनि लेखेरै ढुवानी गरिने गरिएको उनको भनाइ छ ।अनलाइन खबर