October 27, 2020, Tuesday
२०७७ कार्तिक १२

कांग्रेसद्वारा कोरोना र बाढीपहिरोको क्षतिका विषयमा सरकारको ध्यानाकर्षण

288

काठमाडौं – लगातार वर्षाका कारण देशका विभिन्न स्थानमा गएको बाढी पहिरो, लकडाउन खुलेपछि कोरोना, क्षति लगायतका विषयमा  प्रमुख प्रतिपक्षी दल नेपाली कांग्रेसले सरकारको ध्यानाकर्षण गराएको छ ।

कांग्रेस सभापति शेरबहादुर देउवाले आज प्रधानमन्त्री केपी शर्मा ओलीलाई भेटेर ध्यानाकर्षण गराएको मुख्यसचिव कृष्णप्रसाद पौडेलले जानकारी दिएका छन् ।

पौडेलले विज्ञप्ति जारी गर्दै सभापति देउवाले संक्रमितको संख्या बीस हजार पुग्न लागेको र तीन दर्जन बढीको मृत्यु भएको स्थितिमा लक डाउन खुलेपछिको चुनौती सामना गर्न नयाँ र विशेष रणनीति निर्माणका लागि प्रधानमन्त्रीको ध्यानाकर्षण गराएको उल्लेख गरेका छन् ।

सभापति देउवाले विदेशमा अप्ठ्यारोमा परेका नेपालीलाई उद्धार गर्ने काममा तिब्रता दिनपनि आग्रह गरेका छन् । देउवाले बाढी पहिरोका कारण भएको क्षतिका बारेमा समेत प्रधानमन्त्रीसँग छलफल गरेका छन् ।

पौडेलले जारी गरेको विज्ञप्तीमा भनिएको छ, ‘बाढी र पहिरोमा परेर देशका विभिन्न स्थानमा कयौंको मृत्यु, कयौं बेपत्ता र सयौं घरबार बिहिन भएको हुंदा सरकारले उद्धार, राहत र पुनर्स्थापनाका लागि युद्धस्तरमा कार्य गर्न सभापतिले आग्रह गर्नुभएको छ ।’

कोरोनाका कारण सिर्जना भएका चुनौतीहरुका कारण उब्जिएका विभिन्न क्षेत्रका असन्तुष्टि र आन्दोलनहरुले अघि सारेका जायज मागहरूलाई गम्भीरतापूर्वक लिएर सम्बोधन गर्न पनि सभापति देउवाले प्रधानमन्त्रीको ध्यानाकर्षण गराएको मुख्यसचिव पौडेलले जारी गरेको विज्ञप्तिमा उल्लेख छ ।

Recent Update