September 25, 2021, Saturday
२०७८ आश्विन ९

विमान दुर्घटनामा पाइलट आफू मरे तर धेरैलाई बचाए

159

भारतीय राज्य केरलाको कोजिकोडमा शुक्रबार अवतरणका क्रममा भएको विमान दुर्घटनामा बचेका यात्रीहरूले विमानका क्याप्टेनले बुद्धिमताढंगले सम्भावित आगलागी हुन नदिई आफूहरूको ज्यान बचाएको बताएका छन्।

घटनामा दुई पाइलटसहित कम्तिमा २० जनाको मृत्यु भएको थियो। विमानमा चालक दलका सदस्यसहित १९१ जना यात्रु थिए। घटनामा सय भन्दा बढी यात्रु घाइते भएका छन्।

एयर इन्डिया एक्सप्रेसको बोइङ-७३७ मा  कोरोना भाइरसका कारण दुबईमा अलपत्र परेका भारतीय नागरिक सवार थिए। घटना लगत्तै स्थानीय मानिसहरू आगो र धुवाँको वास्ता नगरी उनीहरूलाई सहयोग गर्न घटनास्थल पुगेका उनीहरूले बताए।

‘घनघोर पानी परिरहेको थियो। पाइलटले अवतरण गर्नुअघि नै मौसम एकदमै खराब भएको चेतावनी दिएका थिए। उनले दुईपटक सुरक्षित अवतरणको प्रयास गरेपनि नियन्त्रण गुमाए। जहाज धावनमार्गबाट बाहिर गयो र चिप्लियो अनि दुई टुक्रा भयो। धेरैका लागि यो चमत्कारपूर्ण थियो’, विमान दुर्घटनामा बचेका भि इब्राहिम नामका एक यात्रीले भने।